tot

Walon (Rifondou)

Etimolodjeye

Tayon-bodje latén « totus » (« tot, tchaeke, tot etir »).

Prononçaedje

• AFE :
  • diferins prononçaedjes : /tɔ/ /tu/ (fok deus prononçaedjes) (oyon O.OU)
  • prononçaedje zero-cnoxheu : /tɔ/
• Ricepeures : nén rcepåve

Adviebe

Alofômes

tot

tote

tot

1. mostere on hôt livea di l' adviebe ki shût (nén candjåve).
   • Dji lyi dmande tot biesmint : «eyet vosse feme, ça lyi va» ?
2. mostere on hôt livea di l' addjectif ou d' l' addjectivire (candjåve å femrin, mins nén å pluriyal).
   • Il a rivnou tot frexh di tchôd.
   • I parexhént tot disbåtchîs.
   • Elle esteut tote binåjhe.
   • Elle ont dmoré tote biesses.
   • Si tiesse esteut tote e croles — Sintake Rimåke (fråze rifondowe).
   • Les beas våzes estént tot a bokets.
3. divant on prono d' djin, mostere li rshonnance avou çou k' on ratind di cisse djin la (candjåve å femrin, mins nén å pluriyal).
   • C' est tot lu, la ça, d' ariver ene eure trop tård.
4. mostere on hôt livea do viebe.
   • Mins cwand on lyi derit des noveles då viyaedje
     Et k' il aprinda pår ki l' hiedresse n' esteut pus
     K' ele aveut rindou l' åme cåze … d' èn emacralaedje
     Et k' ele aveut dmandé co traze feyes après lu
     Si vizaedje candja tot
     — Louis Lagauche, "Li ptit hierdî" (1926), p. 151 (fråze rifondowe).

Ratourneures

1. tot a schipe : rafoircixhaedje di a schipe
   • Tot a schipe arivé a l' ospitå d' Calais, on docteur egzamina l' oficî et Pire Lipaye fourit tcherdjî del sognî tot come i l' aveut fwait diski la — Louis Tilkin (fråze rifondowe).

Mots d’ aplacaedje

• totafwaitmint
• totavå
• atchté tot fwait
• tolu
• tot drole, fé tot drole

Sinonimeye

• foirt, pår, mo, mier-, foû, totafwaitmint, completmint; Loukîz a : « foirt »

Nén definixhant prono

tot neute

1. (nén candjåve) mostere l' eshonna des sacwès k' on ndè cåze, sins ndè rovyî ene.
   • I fåt tni tot çoula por lu.
   • I fåt k' on fwaiye tot lu-minme.
2. sacwè l' pus impôrtante (todi avou l' definixhant årtike « li »).
   • Li tot, c' est nén d' wangnî, mins d' î prinde pårt — Lucyin Mahin, ratournant Pierre de Coubertin.

Ratourneures

1. tot toûne al ribolete, n a tot ki toûne li cou
2. c’ est l’ tot di; c’ est nén l’ tot

Sinonimeye

totafwait

Ratournaedjes

eshonna des sacwès k' on ndè cåze, sins ndè rovyî ene

• Arabe : koulli chay' =‎ كل شئ ^(ar) = كُلِّ شَئ ^(ar)
• Arabe marokin : كلشي ^(ary) =‎ kelchi
• Almand : alles ^(de)
• Inglès : everything ^(en)
• Espagnol : todo ^(es)
• Francès : tout ^(fr)
• Neyerlandès : alles ^(nl)

sacwè l' pus impôrtante

• Francès : important ^(fr), essentiel ^(fr), tout ^(fr)

Nén definixhant prezintoe

	singulî	pluriyal
omrin	tot	tos
femrin	tote	totes / totès

1. mostere li sacwè e-n etire.
   • Ritnoz bén tot çki dji vs a dit.
   • Tote ciste ivier, k' il a toumé del nive — Sintake Rimåke (fråze rifondowe).
   • Ç' a stî l' minme ramdam tote djoû et tote nute.
2. mostere les sacwès sins ndè rovyî.
   • Louke on pô totes ces tchampinnes — Sintake Rimåke (fråze rifondowe).
   • C' est totès belès åmayes po repleni après l' ivier.

Ratourneures

1. tote djoû, tote nute
2. di tote foice
3. mete a totes les såces
4. on n’ a nén tos les pås k’ on hosse

Mots d’ aplacaedje

tertos

Ratournaedjes

mostere li sacwè e-n etire

• Inglès : the whole ^(en)
• Espagnol : todo ^(es)
• Francès : tout ^(fr)
• Neyerlandès : de heel ^(nl)

Divancete

tot (nén candjåve)

1. divant on pårticipe prezintrece, çou ki fôrmêye li djerondif.
   • Kimint av trové cisse machine la, Renkin ? Tot tuzant, sire.

Mots d’ aplacaedje

tofjhant ki

Sinonimeye

• e (+ pårticipe prezintrece)
• å (+ viebe sustantivé)

Ratournaedjes

djerondif

• Inglès : -ing ^(en)
• Francès : en ^(fr)
• Neyerlandès : -end ^(nl), aan het + -end

Neyerlandès

Prononçaedje

• AFE : /tɔt/

Divancete

tot

1. diski, disca.

Mots d’ aplacaedje

• tot en met