yebe

Walon (Rifondou)

Etimolodjeye

S’ i gn åreut ene sakî ki sepreut cwè å dfwait di l’ etimolodjeye di « yebe », el pout stitchî vaici.

Prononçaedje

• AFE :
  • diferins prononçaedjes : /ˈjɛp/ /ˈjɛːp/ /ˈjɛ̃p/ /ˈjaːp/ /ˈzjɛːp/ /ˈzjaːp/
  • (pa rfrancijhaedje) /ˈjɛʀp/ /ˈɛːʀp/ /ˈeʀp/
  • prononçaedje zero-cnoxheu : /ˈjɛp/
• Ricepeures : nén rcepåve

Sustantif

singulî	pluriyal
yebe	yebes

yebe f.

1. (mot d’ botanike) plante ki les vatches et des ôtès biesses magnèt cwand ele sont-st a foye.
   • Les fougnants ont bouté a tot spiyî
     Pattavå totes les nouvès yebes. — Gérard Havelange (fråze rifondowe).
   • Les sorcires end alént rades come l’ aloumire sins leyî d’ traeces, apus ki l’ rond d’ leu danse dins l’ yebe. — G. Lucy (fråze rifondowe).
   • Il aveut stî czoupler a t’ corti po fåtchî l’ yebe et il a dmandé 50 uros.
   • Dji nel saveu raveur nete, cisse tchmijhe la, avou ene taetche di yebe.
2. tchamp avou ces plantes la.
3. (avou elipe) yebe ås maladeyes, plante ki médeye on må.
   • Des blancs omes tot s’ clintchant avå gonxhires et vås
     Soyént les yebes k’ aswadjèt et rwerixhèt. — A. Lovegnée (fråze rifondowe).
4. foye di plante k’ a bon gosse, k’ on radjoute dins l’ sope u dins d’ ôtès sôres d’ amagnî.
   • Ele radjoute todi des yebes dins s’ salåde.
5. tchamp di totès sôres di såvadjes plantes ki vént tot seule so ene djouxhire.
   • Leyî on tchamp a l’ yebe po ene anêye.
6. dinrêye k’ est co vete.

Ratourneures

1. magneu d’ yebe
2. i s’ fåt agritchî (s’ tini) ås yebes : i fåt bén waitî a lu (prinde asteme) ; i fåt tni bon, dabôrd k’ on va passer on mwais cwårt d’ eure. On dit eto : i s’ fåt tni (s’ acrotchî) ås coxhes.
3. mete les biesses a l’ yebe : les mete ås tchamps.
   • On mete les biesses a l’ yebe e moes d’ may.
4. c’ est måle yebe : c’ est ene mwaijhe pasteure.
   • Les vatches ni magnèt nén voltî e ç’ pré la : c’ est måle yebe. — ramexhné pa L. Remacle (fråze rifondowe).
5. yebes del Sint-Djhan : yebes ås maladeyes ki sont bén crexhowes et floreyes e moes d’ djun (al Sint-Djhan), k’ on code et fé souwer po totès sôres di bénfwaits.
6. les mwaijhès yebes crexhèt voltî, les målès yebes crexhnut rade : dijhêye po balter onk (ene) k’ a fwait ene crexhinne, u k’ est grand.
7. leyî ene tere a yebe : el leyî cori a djouxhire, cori a royes.
8. mindjî s’ grin a yebe : furler on tcheté divant k’ i n’ åye profité.

Parintaedje

• yerbêye
• yerbou

Mots d’ aplacaedje

• måle yebe, mwaijhe yebe
• yebe å froyon
• yebe ås as
• yebe ås emoroyides
• yebe ås pûs
• yebe ås rates
• yebe d’ agaesse
• yebe di bribeu
• yebe di coixheure
• yebe di cossén
• yebe di feu
• yebe di fleur
• yebe di lape
• yebe di rôze
• yebe di troye

Sinonimeye

• waide

Dizotrins mots

• fenaesse
• four
• fôraedje
• waezon
• rimouye

Ortografeyes

Divant 1900 :

• iebe : E212
• ieb : E203
• ièbe : E212

Après 1900, foû rfondou (Feller, Feller ricandjî, nén Feller) :

• hyêbe : S109
• yêbe : S17 p.28, S109, S117
• yinp : S117
• ziabe : S27
• yèrbe : O3, O4
• ièbe : C1, C9, C100, C106, S0, S40, E1, E2
• ziêbe : S117
• = yăp (yap) : S38 (hagnons 28 & 77)
• érbe : S104
• yâp : S117
• yèbe : S0, O4, O0, E1, C8
• jèbe : E1, E2, E34, E167, E213
• iêbe : S17 p.28
• êrbe : S24, S107

E rfondou walon :

• yebe : R10 ^(lére), R11 ^(lére), R13

Li mot n’ est nén dins : S25, S41, O2, O100.

Ratournaedjes

plante ki les vatches et des ôtès biesses magnèt cwand ele sont-st a foye

• Arabe : Hachîch =‎ حشيش ^(ar) = حَشيش ^(ar)
• Arabe marokin : ربيع ^(ary) = رْبيع =‎ rbi3
• Almand : Gras ^(de)
• Inglès : grass ^(en)
• Espagnol : pasto ^(es), hierba ^(es), grama ^(es)
• Francès : herbe ^(fr)
• Neyerlandès : gras ^(nl)

tchamp avou ces plantes la

• Francès : prairie ^(fr), pâturage ^(fr)

tchamp avou ces plantes la

• Francès : herbes, plante médicinale

foye di plante k’ a bon gosse

• Francès : herbe aromatique, légume condimentaire

totès sôres di såvadjes plantes ki vént tot seule so ene djouxhire

• Francès : jachère ^(fr)

dinrêye k’ est co vete

• Francès : céréale en vert

i s’ fåt agritchî (s’ tini) ås yebes

• Francès : tenir bon contre vents et marées

mete les biesses a l’ yebe

• Francès : mettre les animaux en prairie

c’ est måle yebe

• Francès : c’est un mauvais pâturage

les mwaijhès yebes crexhèt voltî

• Francès : mauvaise herbe pousse toujours

leyî ene tere a yebe

• Francès : laisser une terre en jachère