al viss al vass

Walon (Rifondou)

Etimolodjeye

Motire fwaite avou l’ shuvance i / a so : « vass » (viebe « aler » a l’ atôtchî camaraedrece do prezint d’ l’ indicatif, avou l’ cawete di codjowaedje « -ss » des viebes, come tot-z oyant tote les djins vos dire « wice vass ? ».

Advierbire

al viss al vass (nén candjåve)

sins saveur la k’ on va, sins tuzer.
- Vos n’ estoz pus èn efant ; vos dvoz sepi si l’ crapåde vos dût ; on n’ si va nén spozer insi al viss al vass ; i s’ fåt cnoxhe, k’ on s’ hante divant çoula. — Dieudonné Salme, Li houlo, p. 248-249 (fråze rifondowe).
- Dj’ el a drovou al viss al vass, tot stitchant m’ doet å mitan. — Gabriyel & Gabriyel (fråze rifondowe).
- Al vole, on cloya l’ ouxh des djîsses.
  Li damadje des pezants bayås
  K’ apatraftént al viss al vasss,
  Resdondixheut come des eglomes
  E l’ påjhûlisté d’ ene eglijhe. — Joseph Mignolet, "Li tchant di m' tere", 1935, p. 40.
come on pout, nén trop bén, må, al varade, tot-z ovrant come on halcotî.
- Dji saya d’ djåzer walon, mins al viss al vass. — J. Camus (!!! a-z aveuri) (fråze rifondowe).
sins mirlifitche, sins grandiveusté.
- Les cmeres sol soû cactèt l’ alnute co pé k’ des wesses, … Cial, tot l’ monde vike sins nole manire, al viss al vass — Jacques Morayns, Piereuse (fråze rifondowe).
- Les eures passèt l’ pus sovint
  Al viss al vass, sins rahour. — Jean Rode, dins on ratournaedje da Maurice Carême (fråze rifondowe).
sins ôre, di tos les costés.
- Ké bazår ! totafwait est tapé al viss al vass, on n’ s’ î rtrouve pus. — Motî Haust (fråze rifondowe).
- El guinguete tote frawiante di loumires,
  Ene sote muzike xhiltêye al viss al vass. — Jules Claskin, « Airs di flûte et autres poèmes wallons », édition critique de Maurice Piron, 1956, « Li maisse dèl djowe », 1924, p.52-53 (fråze rifondowe).