Bondjoû Scribus electronicus,
Oyi, vos djhoz djusse, dji n' overe pus si sovint so les pordjets Wikimedia, et on pout minme dire ki dj' a disparexhou dispu on ptit moumint. Li cåze, c' est k' dj' a stî foirt malåde les moes k' ont passé. Dji m' rimete doucetmint, et po tot vs dire i gn a des djous ki ça va et d' ôtes nén.
Dji n' so pus manaedjeu (administrateu) sol Wiccionaire dispu setimbe 2023 et dji n' mi sin nén di m' ripresinter pol moumint (trop scran et trop a fé dins m' vicåreye). Adon, si vos vloz divni administrateu, vos ploz fé vo dmande sol pådje : Wiccionaire:Nosse cåbaret. Dji vos soténrè ! Minme si dji n' a rén dit disk' asteure, dj' a ddja tapé èn ouy a vost ovraedje (cial sol Wiccionaire, mins eto so Wikipedia e francès) et por mi c' est ddja bén assez.
Djusse ene pitite sacwè, cwand vos radjoutez des egzimpes, metans cial avou ene fråze d' Emile Wiket, i vos les fåt rfonde si vs estoz dins l' mwaisse hagnon « Walon (Rifondou) ». Divins no Wiccionaire, il a stî decidé tot å cmince di dispårti les intrêyes e walon sorlon l' sistinme di scrijhaedje (Rifondou, Feller, pre-Feller). C' est ene miete diferint do Wiccionaire e francès.
I gn a co bråmint (bråmint, bråmint) a fé et voste aidance est l' bénvnowe. I n' fåt nén awè sogne di dmander cwand vs avoz ene dotance, a Lucyin ou Pablo, i seront tos deus la eto po vs aspaler cwand vs åroz dandjî. Avou ça, si vs avoz ds idêyes po-z amidrer (rinde meyeu) l' pordjet, vos les ploz atåvler sins tchicter. Nos stans ene tote pitite pougnêye di djins (3-4) a bouter sol Wiccionaire, et po tot vs dire, i gn a sorlon mi des ptitès sacwès k' i fåreut candjî po rinde li pordjet pus simpe, mins nos n' estans nén todi d' acoird inte di nozôtes, metans so l' prononçaedje des mots e rfondou : dire ki tchet et avou si polèt prononcer come tchat et avè (e Feller), c'est por mi rinde li cayet pus målåjheye. Mins ça, i nos fåreut ene grande bate di dvizes...
Mins ttasteure (tot asteure), avoz ene sacwè d' especiåle a dmander ?
A vos eto, ki ça vos våye bén ;-)
