@Waelsch a radjouté : mo-tcheråve. On trouve les deus cognes :
Sol DTW c' est tcheriåve, et i m' shonne ki ça divreut esse èçti-la, come c' est fwait sol viebe tcheryî, neni ?
Po çou k' est di mo dins l' sinse do F. multi, sereut ç' ene prumire ?
L' addjectif c' est bén tcheriåve (il est dins E177), fwait sol viebe tcheryî.
tcherå, lu, c' est on sustantif, motoit bén scawaedje di tcheråvoye.
tcheråve dins tcherå c' est surmint ene flotche, ou èn erî-rfwait; a pårt la (et dins l' discrijhaedje di l' imådje do minme årtike) on nel trouve nole pårt. Djel ricandje.
Po mo-tcheråve, dji n' so nén télmint po fé des intrêyes po des noûmots ki n' ont nén co stî spårdous; co moens avou des fwebes definixhas.
Po mo, i gn a mopliyî ki, come li mot francès est multiplier pout dner ciste idêye la d' eployî mo- po-z adapter l' betchete multi-. (mins i gn a ene diferince, pinse dju; mo c' est bråmint, ene boune cwantité, mins sovint del minme sacwè; dismetant ki multi-, c' est po des sacwès diferinnes et varieyes (minme si end a pô). Li noûmot francès multimodal c' est po des transpoirts di diferinnes sôres, mins i pôreut n' end aveur ki deus. (tot passant, dji trouve multimodal foirt laid, et waire comprindåve; si dji dvreut l' dire e walon, dj' eployreu purade ene sacwè come multi-transpoirt).
Mins nerén, mo- si pout assez åjheymint comprinde dins ç' sinse la eto; mins d' èn ôte costé, mo-tcheriåve, djel comprindreu purade come multi-carrossable (ene rowe avou sacwantès bindes, ene pol tram, ene po les vweteures, ene po les velos...)
« dji n' so nén télmint po fé des intrêyes po des noûmots ki n' ont nén co stî spårdous », mi nerén, mins cwè çk' on pout fé ? Fåreut i mete e plaece ene politike so les noûmots ? I m' shonne ki Lucyin sereut d' acoird avou çoula : « Dji n' sereu nén po mete des noûmots sol Wiccionaire s' i n' ont nén stî "aveuri pa l' uzaedje" (sacwants côps scrîts, si possibe pa dipus d' ene djin). » (vaici).
Cwand dji voe k' Èl-Gueuye-Noere radjoute so Wikipedia des noûmots, metans : cwålistete (po « gazete di cwalité »), k' il est l' seu a comprinde, et k' on n' trouve nole pårt... tot çoula ni m' shonne nén foirt serieus, et, po vs dire el veur, dji cmince a m' escrandi di dveur cori après les racsegnes.
Po mo, djel rissin come vormint, foirt (fok avou èn addjectif ?) : c' est mo corant, c' est mo drole,... Droldimint mo-tcheriåve, djel comprin come åjheymint tcheriåve, k' on pout tcheryî åjheymint.
S' on l' prind pol sinse di multi-, adon poreut on dire d' ene fleur mo-colorijheye (F. « une fleur moult colorisée ») k' ele a bråmint d' coleurs, ey adon prinde el sinse di multicolore, u co d' ene djin mo-miyårdaire k' ele a bråmint des miyårds (multimilliardaire) ? Pocwè nén...
Por mi oyi (å raeze, c' est nén çou ki s' fwait so les ôtes wiccionaires ?)
I gn a kéke tins d' çoula, dj' aveu-st atåvle di n' nén mete (di ç' tins la c' esteut so Motî:) ki des mots k' estént ddja eployîs pa pus d' ene djin, oubonbén k' estént ddja epladîs dispoy on moumint (dj' ô bén, nén po on mot eployî djusse on côp). Après, i fåreut decider a sacwants po les valixhance di tins et d' nombe d' eployaedje po k' on mot poye esse metou sol wiccionaire. On doet fé çoula djustumint pask' i cmince (et c' est ene foirt boune sacwè) a-z aveur sacwantès djins ki scrijhèt e rfondou (foû do ptite ceke di rfondeus-rantoelisses); do côp, ci n' est pus ene pitite sacwè etur soçons, mins vormint ene sacwè å lådje po tote li cminålté di walon-cåzants (çou k' on vleut å cmince); do côp, come po tote societé po-z î viker a môde di djin, i fåt des rîles.
« ene fleur mo-colorijheye » dji l' åreut compris do côp come avou bråmint des coleurs (come e castiyan "muy colorida"... et do côp, dj' åreu motoit fwait "mo-coloreye" purade; la ki "esse colori" c' est "aveur des coleurs" et "colorijhî" c' est "mete e coleur"; les fleurs ont des coleurs da zeles, on n' les mete nén e coleur (såf, bén seur, les blankès rôzes ki dvèt esse rodjes, po nén kel royinne di cour ni vs côpe li tiesse))
