bablou

Walon (Rifondou)

Etimolodjeye

Tayon-bodje latén « balbus » (begyåd).

Prononçaedje

• AFE :
  • diferins prononçaedjes : /ba.ˈblu/ /ba.ˈbly/ (minme prononçaedje cåzu pattavå)
  • prononçaedje zero-cnoxheu : /ba.ˈblu/
• Ricepeures : ba·blou

Addjectif

	singulî	pluriyal
omrin	bablou	bablous
femrin padrî	bablowe	bablowes
femrin padvant	bablowe	bablowès

bablou omrin (come addjectif djondrece, todi metou padrî l’ no)

1. ki voet brouyî, ki voet dobe.
   • Dj' a les oûys tot bablous a cåze do solo.
2. tot peté, tot sbaré.
   • I dmana bablou, li boke å lådje.
   • Leu tchanson rmowe minme l' åme do Diåle; Pus bele ki l' cisse do Råskignoû, C' est ene tchanson ki rind bablou. — André Gauditiaubois (fråze rifondowe).
   • Pus moirt ki vike, i dvént bablou
     — Ep. Martial, Bultén del Societé d' Lidje, Bulletin de 1858, ‘’Li savtî des recoletes’’, 69-73 (fråze rifondowe).

Sinonimeye

peté, sbaré, reyusse, pek, ståmusse; Loukîz a : « ståmusse »

Ratourneures

1. si fé bablou a : drovi les ouys tant k' on voet brouyî.
   • Dji m' a fwait tot bablou a cweri.
2. esse (tot) bablou :
   1. esse maké.
      • Li mwaisse di scole vos el hapéve pa ene pougnêye di tchveas, et l' kischoyeut télmint ki l' pôve efant end esteut tot bablou. — Henri Forir (fråze rifondowe).
      • Bon Diu d' bwès! Ké bea froumadje; Ki dj' soeye bablou si dji n' lyi hape nén s' boket! — Joseph Bily (fråze rifondowe).
   2. vey des sacwès ki n' egzistèt nén.
      • Dji so tot bablou, u cwè?

Parintaedje

• abåbli, asbåbli

(minme sourdant etimolodjike)

• babouyî

Sipårdaedje do mot

w. do Levant, w. do Mitan

Ortografeyes

Divant 1900 :

• bablou : E177a ^(lére)
• bablou, bablouze : E212 ^(lére)

Après 1900, foû rfondou (Feller, Feller ricandjî, nén Feller) :

• bablou : C9, C13, E1, E21, E34
• bablu : C1, C9
• bablou, babloûye : S0

E rfondou walon :

• bablou : R13
• bablou, bablowe : R9 ^(lére), R10 ^(lére)

Li mot n’ est nén dins : S109

Ratournaedjes

ki voet brouyî

• Francès : ébloui ^(fr)

tot peté, sbaré

• Francès : étourdi ^(fr), éberlué ^(fr), stupéfait ^(fr), interdit ^(fr), ébahi ^(fr), émerveillé ^(fr), troublé ^(fr)

esse maké

• Francès : assommé ^(fr), groggy ^(fr), sonné ^(fr), étourdi ^(fr)

vey des sacwès ki n' egzistèt nén

• Francès : avoir la berlue

Adviebe

bablou (nén candjåve)

1. d' ene brouyeye manire.
   • Mi coixheure a m' mwin mi fjheut sofri; portant, djel riwaitive tot bablou, come si dj' åreu volou k' ele ni si rfreut måy. — Lorint Hendschel.

Ratourneures

1. vey (tot) bablou :
   1. vey brouyî (d' esse sô, d' aveur sitî maké, di braire).
      • Cwand Djam ariva-st a Lexhî, å cåbaret des catoize fesses, i veyeut tot bablou: les håyes dansént, les coks et les poyes corént-st evoye, e dobe, sol voye. — Marcel Hicter (fråze rifondowe).
      • Li curé Groyinne a les ouys tot frexhs a ndè vey bablou. — Jean-Pierre Dumont (fråze rifondowe).
      • Dji n' chtroumfêye rén nerén ! Dji voe tot bablou !— Paul-Henri Thomsin, ratournant Lès schtroumpfs èt lès bèrikes èmacralêyes, 2021, p. 11 (fråze rifondowe et rarindjeye).
   2. vey ene sacwè k' on croet nén possibe.

      etinde bablou : etinde des sacwès ki n' egzistèt nén.

   • Est ç' mi ki sondje? etind dj' bablou?

d' ene brouyeye manire

• Francès : avec des yeux hagards

vey brouyî

• Francès : voir trouble, voir trente-six chandelles

vey ene sacwè k' on croet nén possibe

• Francès : avoir la berlue

etinde bablou

• Francès : entendre des voix